2026-yilda xalqaro aviakompaniyalar 41 mlrd dollar sof foyda olishi kutilmoqda

Xalqaro havo transporti assotsiatsiyasi 2026 yilda jahon aviakompaniyalari rekord darajada 41 milliard dollarlik sof foyda olishi mumkinligini ma’lum qildi. Bu haqda Reuters xabar qilmoqda.

Assotsiatsiya ta’kidlaganidek, aviatsiya bozoridagi qator qiyinchiliklar — samolyotlarni o‘z vaqtida yetkazib berilishining sekinlashishi va yangi, yonilg‘i tejamkor laynerlarni ishga tushirish rejalarining kechikishiga qaramay, sektor iqtisodiy jihatdan tiklanish trayektoriyasida qolmoqda.

Ushbu prognoz Airbus kompaniyasining A320 samolyotlaridagi metall fyuzelyaj panellarida aniqlangan sifat muammolari tufayli 2025 yilgi yetkazib berish rejalarini qisqartirgani haqidagi xabarlar ortidan berildi. Har ikki yetakchi ishlab chiqaruvchi — Airbus va Boeing so‘nggi yillarda buyurtmalarni o‘z vaqtida topshirishda jiddiy qiyinchiliklarga duch kelmoqda. Bu esa aviakompaniyalarning ekspluatatsiya xarajatlari, ayniqsa, yoqilg‘i sarfiga ta’sir qilmoqda.

Shunday bo‘lsa-da, Xalqaro havo transporti assotsiatsiyasi rahbariyati sektorning barqaror daromad modelini shakllantira olganini qayd etmoqda. Assotsiatsiya bosh direktori Uilli Uolshning ta’kidlashicha, aviakompaniyalar keyingi yillarda turli sohadagi rivojlanish va xatarlarga moslasha oladigan tizim yaratgan.

Uning so‘zlariga ko‘ra, 6 mingta A320 samolyotida dasturiy ta’minot nosozliklari aniqlanganidan so‘ng, Airbus bir necha hafta ichida fyuzelyajdagi konstruktiv muammolar tufayli yetkazib berish rejalarini yana qisqartirishga majbur bo‘ldi.

Shu bilan birga, Airbus o‘z yillik rejasini 4 foizga qisqartirganini tasdiqladi. Bu holat A320 seriyasi, jumladan, eng ommabop A321 modeli Boeing 737 MAX’ni ortda qoldirib, tarixda eng ko‘p yetkazib berilgan yo‘lovchi samolyotiga aylanganidan qisqa vaqt o‘tib yuz berdi.